灶披间牛皮纸信封焗白果
灶披间
年9月20日星期五
牛
皮
纸
信
封
焗
白
果
沈一珠丨《牛皮纸信封焗白果》
一夜风雨急，
白果落地哴；
焗一焗，
嚼一嚼，
还是一样香。
总算出太阳了，滴滴嗒嗒落仔一礼拜雨，房间里随便啥末事摸上去，侪有点潮叽叽，黏滋滋，像煞可以掐得出水来。齐巧勒电视里看到一条新闻，蛮噱：讲一家人家，屋里墙壁哴，沿牢贴脚线，居然长出一朵朵白蘑菇来。勿晓得迭种蘑菇好喫伐，不过，迭两日，树哴向落下来的白果倒是可以喫了。小区小花园里，地哴水渍还呒么干透，轻轻交走，仔细寻落脚地方。夜里厢拨暴雨冲下来的白果，又拨夜归，或者是早起的人，踏碎勒泥水里，看见仔心里觉着蛮肉麻——一直老欢喜白果，名字也欢喜，样子也欢喜，喫口也欢喜……就像年轻辰光欢喜一个人，欢喜就是欢喜了，呒么道理。是呀，道理，其实侪是长大了再懂的，是规矩，也是马后炮。白果是好末事，中医讲起来，敛肺定喘，止带缩尿。讲起缩尿，还有一只古代人的段子，讲，考生进考场，答卷总要争分夺秒，更何况还有皇帝亲自面试一个环节。所以，为了防止要紧要慢辰光内急，晓得门槛的考生会提早喫一把白果下去。喫多少？有规矩的。所以，规矩是要呃，否则就呒么方圆了。比方讲，白果好喫，但是，生呃勿好喫，有*；熟呃也勿好多喫，据说，一记头喫上千颗白果，人要翘辫子。只不过，啥人会得拿嘎许多白果一记头喫下去啊！有一个老伯伯，教过我一个方法：拿一只牛皮纸信封，装10几粒白果进去，微波炉开高火，转半分钟左右就好了。其实，只要听到里厢白果的爆炸声，从稀稀拉拉，到越来越急，就差勿多了。拿出来稍许冷一冷，剥一只，喫一只，灰绿颜色，像软玉一样的白果，味道老好。老伯伯勒春天里驾鹤西去。而伊屋里门口种的两棵树哴，白果应该又长足长满了伐？白果，每年差勿多，心情，每年侪会有点勿一样。沪语解释：
要紧要慢辰光：紧张时刻。
“点击阅读原文就能购买老师的画作哟”
沈一珠转载请注明：http://www.diandiangame.com/zpjs/5578.html
